Nominations aux comités consultatifs à la magistrature

ᐃᖅᑲᖅᑐᐃᕕᓕᕆᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ
ᓄᓇᕗᒻᒥ
ᑎᒃᑯᐊᖅᓯᔪᑦ ᐊᑎᖓ ᓄᓇᓕᐸᐅᔭᖅ ᖃᓄᐃᑦᑑᖃᑦᑕᖅᓯᒪᓂᖏᓐᓂ ᐅᓂᒃᑳᑦ
ᐊᖏᔪᖅᑳᕆᔭᐅᔪᖅ
ᐃᖅᑲᖅᑐᐃᔨᓄᑦ
ᐃᖅᑲᖅᑐᐃᔨ ᐹᓂ ᑐᓚᒃ ᐃᖃᓗᐃᑦ ᐃᖅᑲᖅᑐᐃᔨ ᐹᓂ ᑐᓚᒃ ᑎᒃᑯᐊᖅᑕᐅᓚᐅᖅᓯᒪᔪᖅ ᓄᓇᕗᑦ ᐃᖅᑲᖅᑐᐃᕕᓕᕆᔨᒃᑯᖏᓐᓄᑦ 2012−ᒥ. ᑎᒃᑯᐊᖅᑕᐅᓚᐅᖅᑎᓐᓇᒍ, ᐃᖅᑲᖅᑐᐃᔨ ᑐᓛᒃ ᐱᕋᔭᑦᑐᓕᕆᓂᕐᒧᑦ ᒪᓕᒐᓕᕆᔨᐅᓚᐅᖅᓯᒪᔪᖅ ᓴᐳᓐᓂᐊᖅᑎᐅᓪᓗᓂ ᐊᒻᒪᓗ ᑯᐃᑦ ᑭᒡᒐᖅᑐᐃᔨᐅᓪᓗᓂᓗ. ᐅᐃᒌᒃ ᓯᕗᓪᓕᖅᐹᒥ ᐊᓐᑎᐅᕆᔪᒦᓐᖔᖅᑐᑎᒃ ᓅᓚᐅᖅᓯᒪᔫᒃ ᑲᖏᖅᖠᓂᕐᒧᑦ 1997−ᒥ, ᐃᖅᑲᖅᑐᐃᔨ ᑐᓛᒃ ᓯᕗᓕᖅᑎᕈᓚᐅᖅᓯᒪᔪᖅ ᐃᖅᑲᓇᐃᔭᖅᑎᓄᑦ ᐊᒻᒪᓗ ᐱᕋᔭᑦᑐᓕᕆᓂᕐᒧᑦ ᒪᓕᒐᓕᕆᔨᐅᓪᓗᓂ ᑭᕙᓪᓕᕐᒧᑦ ᐃᖅᑲᖅᑐᐃᕕᓕᕆᔨᒃᑯᖏᓐᓄᑦ. ᐱᒋᐊᓐᖓᕐᓂᖓᓂ 2000−ᒥ, ᐊᕐᕌᒍᓄᑦ ᐱᖓᓱᓄᑦ ᐅᖅᓱᖅᑑᒥᐅᑕᐅᓚᐅᖅᓯᒪᔪᖅ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᓪᓗᓂ ᑯᐃᑉ ᑭᒡᒐᖅᑐᐃᔨᒋᓪᓗᓂᐅᒃ ᑭᒃᑯᑐᐃᓐᓇᐃᑦ ᑯᐃᑉ ᑭᒡᒐᖅᑐᐃᔨᖏᑕ ᑎᒥᖓᓐᓄᑦ. ᐃᖃᓗᓐᓄ ᓅᑦᑕᓕᕆᕗᖅ ᐊᒻᒪᓗ, 2006−ᒥ ᓄᓇᕗᒻᒥ ᐊᖏᔪᖅᑳᖅᑖᕆᔭᐅᓪᓗᓂ ᑯᐃᑉ ᑭᒡᒐᖅᑐᐃᔨᖏᓐᓄᑦ ᐊᓪᓚᕕᖓᓐᓂ ᑲᓇᑕᐅᑉ ᑯᐃᑉ ᑭᒡᒐᖅᑐᐃᔨᖁᑎᖏᓐᓂ. ᐃᖅᑲᖅᑐᐃᔨ ᑐᓚᒃ ᐱᒋᐊᖅᑎᑦᑎᖃᑕᐅᓚᐅᖅᓯᒪᔪᖅ ᒪᓕᒐᓕᕆᓂᕐᒧᑦ ᓴᓴᐃᔭᑎᒃᑯᖏᓐᓂ ᓄᓇᕗᒻᒥ, ᑲᑎᒪᔨᐅᖃᑕᐅᓪᓗᓂᓗ ᐊᑭᑦᓯᕋᖅ ᒪᓕᒐᓕᕆᓂᕐᒧᑦ ᐃᓕᓐᓂᐊᕈᑎᓕᕆᔨᒃᑯᓐᓂ, ᐊᒻᒪᓗ ᐱᒋᐊᖅᑎᑦᑎᖃᑕᐅᓯᒪᒋᓪᓗᓂ ᑲᖏᖅᖠᓂᕐᒥ ᐊᐃᑉᐸᕇᑦ ᓂᖓᖃᑦᑕᐅᑎᖃᑦᑕᖅᑐᓄᑦ ᐃᑲᔪᖅᑐᐃᔨᓂᒃ. 2007-ᒥ 2012−ᒧᑦ, ᐅᖃᐅᔾᔨᒋᐊᖅᑎᐅᓚᐅᖅᓯᒪᔪᖅ ᐅᑭᐅᖅᑕᖅᑐᒥᑦ ᖃᓄᐃᒍᑕᐅᖃᑦᑕᖅᑐᓄᑦ ᐊᓪᓚᕕᖓᓐᓂ ᑲᓇᑕᒥ ᑯᐃᑉ ᑭᒡᒐᖅᑐᐃᔪᓕᕆᔨᒃᑯᖏᓐᓂ, ᐋᑐᕚᒥ. ᐃᖅᑲᖅᑐᐃᔨ ᑐᓚᒃ ᐅᑎᑦᑕᓕᓚᐅᖅᓯᒪᒋᕗᖅ ᐃᖃᓗᓐᓄᑦ 2012−ᒥ ᑎᒃᑯᐊᖅᑕᐅᓪᓗᓂ ᐃᖅᑲᖅᑐᐃᔨᐅᓂᕐᒧᑦ.
ᑲᓇᑕᒥ
ᒪᓕᒐᔨᕆᔩᑦ
ᑲᑐᔾᔨᖃᑎᒌᖏᑦ
ᑳᑐᕋᓐ ᑲᓛ ᐃᖃᓗᐃᑦ ᑳᑐᕋᓐ ᑲᓛ ᐱᕋᔭᑦᑐᓕᕆᓂᕐᒧᑦ ᒪᓕᒐᓕᕆᔨ ᒪᓕᒐᓂᒃ ᑐᑭᓯᓂᐊᕐᕕᒃᑯᖏᓐᓂ, ᐊᐅᓚᑕᐅᓪᓗᑎᑦ ᒪᓕᒐᓕᕆᓂᕐᒧᑦ ᐱᔨᑦᑎᕋᖅᑏᑦ ᑲᑎᒪᔨᖏᓐᓄᑦ. ᓄᓇᓕᓐᓄᑦ ᐊᐅᓪᓚᖃᑦᑕᖅᑐᖅ ᓄᓇᕗᓕᒫᒥ ᐃᑲᔪᕆᐊᖅᑐᓂ ᑭᒡᒐᖅᑐᐃᔭᖅᑐᖅᑐᓂᓗ ᓴᐳᓐᓂᐊᕆᐊᓕᓐᓂᑦ ᓄᓇᕗᑦ ᐃᖅᑲᖅᑐᐃᕕᓕᕆᔨᒃᑯᖏᓐᓄᑦ ᒫᓐᓇ ᐃᖃᓗᓐᓂ ᐊᓪᓚᕕᖃᖅᑐᖅ, ᐊᕐᕌᒍᓂᒃ ᐱᖓᓱᓂᒃ ᑲᖏᖅᖠᓂᕐᒥᐅᑕᐅᓚᐅᖅᓯᒪᒻᒥᔪᖅ. ᒪᓕᒐᓕᕆᔨᕈᓚᐅᖅᑎᓐᓇᒍ 2011−ᒥ, ᑲᓛ ᐱᕋᔭᑦᑐᓕᕆᓂᕐᒧᑦ ᓴᐳᓐᓂᐊᖅᑎᐅᓚᐅᖅᓯᒪᔪᖅ ᑐᕌᓐᑐᒥ. ᒪᓕᒐᓕᕆᔨᕈᓚᐅᖅᓯᒪᔪᖅ ᓯᓚᑦᑐᖅᓴᕐᕕᔾᔪᐊᒥ ᐊᒻᒪᓗ ᐃᓕᓐᓂᐊᑲᓐᓂᖅᓯᒪᓪᓗᓂ ᑭᒃᑯᑐᐃᓐᓇᐃᑦ ᐱᖁᔭᖏᓐᓂ ᔪᐊᒃ ᓯᓚᑦᑐᖅᓴᕐᕕᔾᔪᐊᖓᓐᓂ. ᑲᓛ ᐊᖏᔪᖅᑳᕆᔭᐅᒋᓪᓗᓂ ᑲᓇᑕᒥ ᒪᓕᒐᓕᕆᔩᑦ ᑲᑐᔾᔨᖃᑎᒌᖏᓐᓄᑦ, ᓄᓇᕗᒻᒥᓪᓗ. ᐃᔅᓯᕙᐅᑕᐅᓪᓗᓂ ᑲᑎᒪᔨᕋᓛᓄᑦ ᓄᓇᕗᑦ ᒪᓕᒐᓕᕆᓂᕐᒧᑦ 2016−ᒥ, ᐱᖃᓯᐅᔾᔨᓪᓗᓂ ᑭᒃᑯᑐᐃᓐᓇᕐᓄᑦ ᒪᓕᒐᓕᕆᓂᕐᒥᑦ ᐃᓕᓐᓂᐊᖃᑕᐅᓯᒪᔪᓂᑦ ᐊᒻᒪᓗ ᐱᓕᒻᒪᓴᓐᖑᐊᖅᑐᓂᑦ ᐃᓕᓐᓂᐊᖅᑎᓂ ᐃᓕᓐᓂᐊᕕᔾᔪᐊᕐᒥ ᐃᖃᓗᓐᓂ, ᐃᑲᔪᖃᑦᑕᓲᖑᒻᒥᔪᖅ ᖃᔪᖅᑐᕕᒻᒥ ᐃᖃᓗᓐᓂ.
ᒪᓕᒐᓕᕆᓂᕐᒧᑦ
ᓴᓴᐃᔭᑎᒃᑯᑦ
ᓄᓇᕗᒻᒥ
ᔫᓯᐱ
ᒨᑖᒃ−ᐸᓚᐅᕗᔅ
ᐃᖃᓗᐃᑦ ᔫᓯᐱ ᒨᑖᒃ−ᐸᓚᐅᕗᔅ ᐃᓄᓪᓚᕆᐅᓪᓗᓂ ᓛᐸᑐᐊᒥᐅᑕᔅᓴᔭᐅᓪᓗᓂ ᐊᒻᒪᓗ ᓄᓇᕕᒻᒥ. ᐱᕋᔭᑦᑐᓕᕆᓂᕐᒧᑦ ᓴᐳᓐᓂᐊᖅᑎᐅᔪᖅ ᒪᓕᒐᓂᒃ ᑐᑭᓯᓂᐊᕐᕕᒃᑯᖏᓐᓄᑦ ᐃᖃᓗᓐᓂ, ᒪᓕᒐᓕᕆᓂᕐᒧᑦ ᐱᔨᑦᑎᕋᖅᑏᑦ ᑲᑎᒪᔨᖏᓐᓄᑦ ᐊᐅᓚᑕᐅᓪᓗᑎᑦ ᓄᓇᕗᒻᒥ. ᐃᓕᓐᓂᐊᓚᐅᖅᓯᒪᔪᖅ ᐸᐃᑉᐹᖅᑖᖅᑐᓂᓗ ᐃᓄᑐᐃᓐᓇᓄᓪᓗ ᒪᓕᒐᓕᕆᓂᑐᐃᓐᓇᒧᓪᓗ ᒪᒋᐅ ᓯᓚᑦᑐᖅᓴᕐᕕᔾᔪᐊᖓᓐᓂ. ᒪᓕᒐᓕᕆᓂᕐᒧᑦ ᐃᓕᓐᓂᐊᕐᓂᖓᓐᓂ, ᒨᑖᒃ−ᐸᓚᐅᕗᔅ ᐃᓚᒋᔭᐅᓚᐅᖅᓯᒪᒻᒥᔪᖅ ᑳᕙᔅᑭᒻᕼᐊᓐ ᒨᑦᑯᓐᓄᑦ, ᐃᓕᓴᐃᔨᐅᓪᓗᓂ ᒪᒋᐅᒥ ᓄᓇᖃᖅᑳᖅᑐᒥᓂᕐᓂᑦ ᖃᐅᔨᓴᖅᑐᓕᕆᓂᕐᒧᑦ ᐃᓕᓐᓂᐊᑎᑦᑎᖃᑦᑕᖅᑐᓂ, ᐊᒻᒪᓗ ᖃᐅᔨᓴᕐᓂᕐᒥᑦ ᓄᓇᖃᖅᑳᖅᑐᒥᓂᕐᓂᑦ ᒪᓕᒐᓕᕆᓂᕐᒧᑦ ᐊᒻᒪᓗ ᐃᓄᐃᑦ ᖃᓄᖅ ᐃᓕᖅᑯᓯᖏᓐᓂ ᑎᒍᐊᕐᓂᕐᒥᑦ ᖃᐅᔨᓴᖃᑦᑕᖅᑐᓂ. ᐱᔭᕇᕐᖓᑦ, ᒨᑖᒃ−ᐸᓚᐅᕗᔅ ᐊᓪᓚᑦᑎᐅᓕᓚᐅᖅᓯᒪᔪᖅ ᐃᖅᑲᖅᑐᐃᔨᒧᑦ ᒫᑕᒥᓐ ᐊᒻᒪᓗ ᐃᖅᑲᖅᑐᐃᔨᒧᑦ ᑲᐃᓐᒧᑦ ᒐᕙᒪᑐᖃᒃᑯᓐᓂ ᐃᖅᑲᖅᑐᐃᕕᓕᕆᔨᒃᑯᓐᓂ ᑲᓇᑕᒥ. ᐃᖃᓗᓐᓄᑦ ᓅᑦᑕᖅᑯᖅ ᒫᓐᓇ ᐃᓕᒋᔭᒥᓄᑦ ᐃᖅᑲᓇᐃᔭᖅᑐᓂ ᒪᓕᒐᓕᕆᓂᕐᒧᑦ ᐱᔨᑦᑎᕋᖅᑏᑦ ᑲᑎᒪᔨᖏᓐᓄᑦ.
ᑭᒃᑯᑐᐃᓐᓇᕐᓂᑦ
ᑭᒡᒐᖅᑐᐃᔨ
ᔮᒃ ᕼᐃᒃᔅ ᑲᖏᖅᖠᓂᖅ ᔮᓐ ᕼᐃᒃᔅ ᐃᓐᓇᐅᔪᖅ ᖃᓪᓗᓈᑎᑑᕈᓐᓇᖅᑐᓂ ᐃᓄᑦᑎᑑᕈᓐᓇᖅᑐᓂᓗ. ᐃᓅᓚᐅᖅᓯᒪᔪᖅ ᐱᔅᑐ ᐸᐃᒥᑦ, ᐅᐊᓐᓇᖅᐸᓯᖓᓐᓂ ᑲᖏᖅᑐᐊᓘᑉ ᐃᒪᖓᓐᓂ, ᑲᒪᒍᒪᓗᐊᓐᖑᐊᖃᑦᑕᖅᑐᖅ ᐃᖅᑲᓇᐃᔮᕐᒥᓂᑦ ᑕᒪᒃᑯᐊ ᑲᑐᔾᔨᖃᑎᒌᑦ ᑖᓐᓇᓗ ᐃᓚᓕᐅᔾᔭᐅᖏᓐᓇᖁᔨᖃᑦᑕᖅᑐᓂ ᒪᑭᒪᔾᔪᑎᐅᔪᓐᓇᖅᑐᓂᑦ. ᒫᓐᓇ ᓇᒻᒥᓂᖁᑎᖃᖅᑐᖅ ᐊᐅᓚᑦᑐᓂᒋᓪᓗ ᒪᕐᕉᒃ ᑐᔪᕐᒥᕖᒃ ᑲᖏᖅᖠᓂᕐᒥ, ᐊᒻᒪᓗ ᑲᒻᐸᓂᖃᕆᓪᓗᓂ ᐱᖅᑯᓯᓕᕆᓂᕐᒥᑦ ᖃᐅᔨᒪᓂᕐᒥᑦ ᐊᕙᑎᓕᕆᓂᕐᒥᓪᓗ ᐊᒻᒪᓗ ᐳᓚᕋᖅᑐᓕᕆᓂᕐᒨᖓᔪᓂᑦ. ᕼᐃᒃᔅ ᑲᑎᒪᔨᐅᖃᑕᐅᕋᑖᓚᐅᕐᒥᔪᑦ ᕼᐊᒻᒪᓚᒃᑯᓐᓄᑦ ᐊᒻᒪᓗ ᐱᖓᓱᓄᑦ ᑐᖏᓕᕇᓐᓄᒃ ᐃᓕᓯᒪᓚᐅᖅᓯᒪᓪᓗᓂ ᒪᐃᔭᒧᑦ ᑲᖏᖅᖠᓂᕐᒥ. ᒫᓐᓇ ᐊᐃᕙᔨᒻᒪᕆᒋᔭᐅᔪᖅ ᓄᓇᕗᑦ ᑐᓐᖓᕕᒃᑯᓐᓄᑦ ᑲᒪᑎᓪᓗᒋᑦ ᑕᓇᐃ ᐊᒻᒪᓗ ᐃᓄᐃᑦ ᓄᓇᑖᕈᑎᖏᓐᓂ ᓂᒋᖅᐸᓯᐊᓄᑦ ᓄᓇᕗᒻᒥ ᒫᓂᑑᐸᒥᓗ, ᐊᒻᒪᓗ ᐊᐃᕙᔨᒻᒪᕆᒋᔭᐅᒋᓪᓗᓂ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑲᒪᑎᓪᓗᒋᑦ ᐃᓄᐃᑦ ᐊᑦᑐᖅᑕᐅᓂᐊᕐᓂᕐᒧᑦ ᐱᕚᓪᓕᕈᑎᔅᓴᓄᓪᓗ ᐊᖏᕈᑎᖓᓐᓄᑦ ᑖᒃᑯᓄᖓ ᒪᓕᑏᓐ ᐊᒻᒪᓗ ᒪᑐᐹᒃ ᒎᓗᓯᐅᖅᑎᓄᑦ. ᐊᕐᕌᒍᓄᑦ ᖁᓕᓄᑦ ᐊᖏᔪᖅᑳᕆᔭᐅᓚᐅᖅᓯᒪᔪᑦ ᐊᐅᓚᑦᑎᔨᒋᔭᐅᓪᓗᓂᓗ ᓄᓇᕗᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒃᑯᖏᓐᓄᑦ, ᑲᒪᖃᑦᑕᖅᑐᓂᑦ ᓇᒻᒥᓂᖃᖅᑎᐅᔪᓂᑦ 7−ᓂᑦ ᓄᓇᓕᓐᓂ ᓄᓇᕗᒻᒥ. ᐱᓕᕆᐊᕆᖃᑦᑕᖅᓯᒪᔭᖏᓐᓄᑦ ᐃᓕᓴᕆᔭᐅᖃᑦᑕᖅᓯᒪᔪᖅ ᑐᓂᔭᐅᕙᑦᑐᓂᓗ ᓄᓇᕗᑦ ᐳᓚᕋᖅᑐᓕᕆᔨᒃᑯᖏᓐᓄᑦ (ᑲᑐᔾᔨᖃᑎᒌᒥᑦ ᒪᑭᑉᐸᓪᓕᐊᑎᑦᑎᖃᑕᐅᓚᐅᖅᓯᒪᔪᖅ) ᐊᒻᒪᓗ ᕿᑭᖅᑖᓗᒻᒥ ᐊᕕᑦᑐᖅᓯᒪᔪᓂᑦ ᓇᒻᒥᓂᖃᖅᑐᓕᕆᓂᕐᒧᑦ ᑲᒪᔩᑦ. ᐱᕕᖃᓕᕋᐃᒻᒪᑦ, ᕿᒻᒥᒃᑯᕕᖏᓐᓂ ᕿᒻᒥᖏᓐᓂ ᑲᒪᖃᑦᑕᖅᑐᖅ, ᓱᒃᑲᓕᓂᑭᓴᐅᑎᓂᐊᖅᑐᓂᓗ ᐋᖅᑭᔅᓱᐃᖃᑕᐅᖃᑦᑕᖅᑐᓂ, ᐊᐅᓚᑦᑎᖃᑕᐅᖃᑦᑕᖅᑐᓂᓗ ᐊᕐᕌᒍᑕᒫᑦ ᐆᒪᔪᕐᓄᑦ ᓘᑦᑖᒥᑦ ᑲᖏᖅᖠᓂᕐᒨᕆᐊᖃᖅᑎᓪᓗᒋᑦ.
ᑭᒃᑯᑐᐃᓐᓇᕐᓂᑦ
ᑭᒡᒐᖅᑐᐃᔨ
ᐃᓚᐃᔭ ᐸᓪᓗᖅ ᑭᒻᒥᕈᑦ ᐃᓚᐃᔭ ᐸᓪᓗᖅ ᐃᓄᑦᑎᑐᑦ ᐅᖃᐅᓯᓕᒃ ᐃᓐᓇᐅᓪᓗᓂ ᑭᒻᒥᕈᕐᒥᐅᑕᐅᓪᓗᓂ. ᒫᓐᓇ ᐃᑲᔪᖃᑦᑕᖅᑐᖅ ᐃᓐᓇᕐᓂᑦ ᓂᕿᔅᓴᖏᓐᓄᑦ ᐃᑲᔫᑎᓂᑦ ᐊᒻᒪᓗ ᐋᖅᑮᓯᒪᓪᓗᓂ ᐃᑲᔫᑎᐅᔪᓂ ᕿᑭᖅᑖᓗᒻᒥ ᐃᑲᔪᖅᑕᐅᕕᒻᒦᓐᖔᖅᓯᒪᔪᓂᑦ ᐸᒥᐅᔭᖅ ᓄᓇᓕᕋᓛᖏᓐᓅᕈᔾᔨᖃᑦᑕᖅᑐᓂ. 2007-2015−ᒥᑦ, ᑲᑎᒪᔨᐅᖃᑕᐅᓯᒪᔪᖅ ᓄᓇᕗᑦ ᒪᓕᒐᓕᕆᓂᕐᒧᑦ ᐱᔨᑦᑎᕋᖅᑏᑦ ᑲᑎᒪᔨᖏᓐᓄᑦ. ᐸᓪᓗᖅ ᑲᑎᒪᔨᐅᖃᑕᐅᕋᑖᓚᐅᖅᑐᖅ ᑭᒻᒥᕈᑦ ᕼᐊᒻᒪᓚᒃᑯᖏᓐᓄᑦ ᐊᒻᒪᓗ ᑭᒻᒥᕈᑦ ᐃᓪᓗᓕᕆᔨᒃᑯᖏᓐᓄᑦ. ᐊᓪᓚᑦᑎᐅᔪᖅ ᑮᓇᐅᔭᓕᕆᔨᒋᔭᐅᓪᓗᓂᓗ ᑯᐊᐸᒃᑯᓐᓄᑦ ᑭᒻᒥᕈᒻᒥ ᐊᒻᒪᓗ ᐋᓐᓕᑲᒃᑯᑦ ᑐᔅᓯᐊᕐᕕᖓᓐᓄᑦ ᑲᑎᒪᔨᐅᖃᑕᐅᓯᒪᓕᖅᑐᓂ ᖁᓕᐅᓗᐊᖅᑐᓄᑦ ᐊᕐᕌᒍᓄᑦ. ᐅᓪᓗᒥᐅᔪᖅ, ᐸᓪᓗᖅ ᐊᑭᓕᖅᓱᖅᑕᐅᒐᓂ ᐃᑲᔪᖃᑦᑕᖅᑐᖅ ᓄᓇᖅᑲᑎᖏᓐᓂ ᐊᓯᕙᕈᑎᖃᓐᖏᑦᑐᓄᑦ ᐅᕝᕙᓘᓐᓃᑦ ᐱᖅᑯᓯᕆᓂᕐᒧᖓᔪᓂᑦ ᖃᓄᐃᓘᖅᑎᑦᑎᓇᓱᐊᖃᑦᑕᖅᑐᓂ. ᐃᓕᓐᓂᐊᑎᑦᑎᖃᑦᑕᖅᑐᓂ ᐊᓯᕙᕐᓂᕐᒥᑦ ᐱᖅᑯᓯᓕᕆᓂᒻᒥᓪᓗ ᖃᓄᐃᓘᖅᑎᑦᑎᖃᑦᑕᖅᑐᓂ ᓄᓇᓕᓐᓂ ᐊᑭᓕᖅᓱᖅᑕᐅᒐᓂ, ᓇᒻᒥᓂᕐᓗ ᐃᓕᓐᓂᐊᖅᓯᒪᓐᓇᓂ ᐃᓪᓗᓕᐅᖃᑦᑕᖅᑐᖅ ᐃᓪᓗᕋᓛᓂᓪᓗ ᓄᓇᖓᓐᓂ. ᐸᓪᓗᖅ ᓴᓇᓐᖑᐊᖅᑎᐅᓪᓗᓂ ᐅᒃᑯᓯᔅᓴᓂᓪᓗ ᓴᓇᓐᖑᐊᓲᖑᓪᓗᓂ.
ᑭᒃᑯᑐᐃᓐᓇᕐᓂᑦ
ᑭᒡᒐᖅᑐᐃᔨ
ᓖᓇ ᐲᑐᓴᓐ ᖁᒡᓗᒃᑑᖅ ᓖᓇ ᐹᑐᓴᓐ ᐃᓐᓇᐅᔪᖅ ᖁᓪᓗᖅᑑᒥᐅᑕᐅᓪᓗᓂ. ᓯᕗᓪᓕᖅᐹᖑᓪᓗᓂ ᐊᕐᓇᐅᓪᓗᓂ ᓂᕈᐊᖅᑕᐅᓚᐅᖅᓯᒪᔪᖅ ᓄᓇᑦᑎᐊᑉ ᒪᓕᒐᓕᐅᕐᕕᖓᓐᓄᑦ, ᒪᓕᒐᓕᐅᖅᑎᐅᓪᓗᓂ 1970-ᒥᑦ 1975−ᒧᑦ. ᐹᑐᓴᓐ ᐃᖅᑲᓇᐃᔮᖃᖃᑦᑕᖅᓯᒪᔪᖅ ᐃᓅᓯᓕᕆᔨᐅᓂᕐᒥᑦ ᐃᓄᓕᕆᔨᐅᓂᕐᒥᓪᓗ, ᐃᓚᒌᓐᓂᓪᓗ ᐃᑲᔪᖃᑦᑕᖅᑐᓂ, ᓱᕈᓯᕐᓂᑦ ᐃᓅᓱᑦᑐᓂᓕᓗ, ᐊᒻᒪᓗ ᑭᒃᑯᑐᐃᓐᓇᕐᓂᑦ ᐅᐃᕆᔅᓯᒪᔪᓄᑦ ᐃᑲᔪᖅᑕᐅᔪᒪᔪᓄᑦ. ᐱᓯᒪᑦᑎᔨᐅᖃᑕᐅᓯᒪᔪᖅ ᐊᖏᕐᕋᓂ ᐹᒃᑯ ᐊᖏᕐᕋᕆᔭᐅᔪᓄᑦ, ᐃᑲᔪᖅᑕᐅᕕᒻᒥ ᐃᓅᓱᑦᑐᓄᑦ ᔨᐊᓗᓇᐃᒥ. ᐹᑐᓴᓐ ᑐᑭᒧᐊᑦᑎᑦᑎᔨᐅᓯᒪᒻᒥᔪᖅ ᐃᓕᓐᓂᐊᕈᑎᔅᓴᓂᑦ ᐊᒻᒪᓗ ᐃᑲᔪᖅᑎᐅᓪᓗᓂ ᐊᐅᓚᑦᑎᔨᖓᓐᓄᑦ ᓄᓇᕗᑦ ᐃᖅᑲᖅᑐᐃᕕᓕᕆᓂᕐᒥᑦ ᐃᓚᕕᑦ ᐅᐸᑲᑦᑕᕐᕕᐅᔪᒥᑦ ᖁᓪᓗᖅᑑᒥ ᐊᒻᒪᓗ ᐃᓚᒌᓐᓄᑦ ᐃᑲᔪᖅᑐᐃᔨᐅᓪᓗᓂ ᔨᐊᓗᓇᐃ ᐊᕐᓇᓄᑦ ᐅᐸᑲᑦᑕᕐᕕᐅᔪᒥᑦ, ᐊᓯᖏᓐᓂᓪᓗ ᑲᒪᖃᑦᑕᖅᓯᒪᒻᒥᔪᖅ. 2001-ᒥᑦ 2003−ᒧᑦ, ᓄᓇᕗᑦ ᒪᓕᒐᓕᕆᓂᕐᒧᑦ ᑲᒥᓴᓇᒃᑯᖏᓐᓃᓚᐅᖅᓯᒪᓪᓗᓂ, ᐃᑲᔪᖃᑦᑕᖅᑐᓂ ᑭᒃᑯᑐᐃᓐᓇᕐᓂᑦ ᑲᑎᒪᑎᑦᑎᖃᑦᑕᖅᑐᓂ ᓄᓇᕗᓕᒫᑦ ᓄᓇᓕᖏᓐᓄᑦ ᒪᓕᒐᓕᕆᓂᕐᒨᖓᔪᓂᑦ ᓄᑖᕐᒧᑦ ᓄᓇᑦᓯᐊᕐᒧᑦ. ᐊᔾᔨᒌᓐᖏᑦᑐᓂᑦ ᐅᖃᐅᓯᓕᒃ ᑕᐃᓂᔅᑎᑐᑦ, ᖃᓪᓗᓈᑎᑐᑦ, ᐃᓄᑦᑎᑐᑦ ᐃᓄᐃᓐᓇᖅᑐᓪᓗ.
Date de modification :